Երբ բառերը դառնում են գույն․ աշակերտներն արվեստի միջոցով նորովի բացահայտում են Սարոյանին
Ի՞նչ գույն ունի Սարոյանի բառը։ Ի՞նչ պատկեր կարող է ծնվել մի նախադասությունից, մի հերոսից կամ մի զգացումից։ Այս հարցերին իրենց գույներով ու երևակայությամբ պատասխանել են Հայաստանի տարբեր մարզերի դպրոցականներ՝ ոգեշնչվելով Վիլյամ Սարոյանի «Նարիջները» և «Հինգ հասուն տանձերը» պատմվածքներից։
«Սարոյանական օրեր» միջոցառումների շրջանակում ՔՈԱՖ-ը հայտարարել է գեղարվեստական աշխատանքների մրցույթ, որը նպատակ ուներ բացահայտել Սարոյանին նոր տեսանկյունից՝ ոչ միայն որպես գրող, այլ նաև որպես նկարիչ։
Լոռու, Արմավիրի, Արագածոտնի, Շիրակի և Սյունիքի 10–15 տարեկան 168 աշակերտ դիմել է մրցույթին։ Ժյուրին առանձնացրել է 15 լավագույն աշխատանք, որոնք վերջերս ցուցադրվել են Եղիշե Չարենցի անվան գրականության ու արվեստի թանգարանում կայացած «Սարոյանական գույներ․ բառերից անդին» Վիլյամ Սարոյանի նկարչական աշխատանքների միջազգային ցուցադրության փակման ընդունելությանը։
Միջոցառման ընթացքում ՔՈԱՖ-ի գործադիր տնօրեն Լիաննա Ղալթաղչյանն վկայականներ ու նվերներ է հանձնել մրցույթի հաղթողներին։
««Սարոյանական օրերի» շրջանակում ՔՈԱՖ-ը չի սահմանափակվել միայն արվեստի գործերի մրցույթով։ ԱՄՆ դեսպանատան աջակցությամբ իրականացվող անգլերենի Աքսես ծրագրի ուսանողների հետ կազմակերպել ենք գրողի գործերի ընթերցանություն ու դրանց հիման վրա ստեղծվել են փոքրիկ ֆիլմեր»,- իր խոսքում նշել է Ղալթաղչյանը։
Արմավիրի մարզի Նորապատ գյուղից Մարիան, ոգեշնչվելով Սարոյանի «Հինգ հասուն տանձեր» պատմվածքի սյուժեով, պատկերել է դեպի արևն ու ազատությունը ցատկող տղայի։
«Մանկուց նկարում եմ,, բայց պրոֆեսիոնալ մեկ տարի է ինչ զբաղվում եմ նկարչությամբ։ Այս նկարը ստեղծելու գաղափարն անմիջապես է առաջացել։ Մի օրում սկեչն եմ արել, իսկ երկրորդ օրն արդեն ջրաներկով գունավորել»,- ստեղծագործական ընթացքի մասին պատմում է Մարիան։
Մրցույթի երկրորդ բաղադրիչով առանձնացվել են ամենաակտիվ դպրոցները՝ ըստ ներկայացված աշխատանքների քանակի։ Լավագույն հնգյակը գլխավորում են Գյումրիի, Մարալիկի, Աշնակի, Արտենիի, Վանաձորի և Գորիսի դպրոցները։
Այս նախաձեռնությունը ևս մեկ անգամ ցույց է տալիս, թե ինչպես կարող է գրականությունը վերածվել գույնի, իսկ բառը՝ պատկերի՝ բացահայտելով երեխաների ստեղծագործական ներուժն ու կապը համաշխարհային գրական ժառանգության հետ։
